Rapport om sjøulykke med fiskefartøyet Gunn-Lotte LM2699 der ein fiskar fall over bord utanfor Stamsund den 26. januar 2024

Kystradio Nord fekk eit VHF-oppkall frå fiskaren på kanal 16. Fiskaren etterspurde hjelp frå redningsskøyte og informerte om at han hadde fått noko i propellen og dreiv mot land utan framdrift. Nærliggjande fartøy som høyrde meldinga, og som hadde høve til å hjelpe, forstod ikkje alvoret med det same.

Frå fiskaren fall i sjøen til redningsmannen var hos han, tok det 3–4 minutt, og då var fiskaren medvitslaus. Det er uklart kva som førte til at fiskaren mista medvitet så raskt, men fallet i det kalde vatnet kan ha ført til kuldesjokk, som i kombinasjon med bølgjer auka faren for inhalering av vatn og drukning.

Bruk av redningsdrakt aukar overlevingsevna i kaldt vatn vesentleg og reduserer faren for sjokk ved fall over bord. Redningsdrakta var funnen fram og låg klar i styrehuset, men det er uklart kvifor ho ikkje blei nytta, då Kystradio Nord fleire gonger bad fiskaren om å ta ho på seg. Ulykka viser at ein situasjon raskt kan utvikle seg til å bli kritisk, og det å handle proaktivt og nytte dei hjelpemidla ein har om bord, kan vere avgjerande.
I tillegg er det viktig å følgje dei instruksane som blir gitt frå Kystradioen og dei andre redningsinstansane.

Publisert 28.11.2024